Պուտինը լուրջ հետևանքների կբախվի․ խաղադրույքները բարձր են․ Թրամփ

ԱՄՆ նախագահ Դոնալդ Թրամփը սպառնացել է Ռուսաստանին տնտեսական հետևանքներով, եթե Ալյասկայում գագաթնաժողովը ձախողվի։ APA-ն հաղորդում է, որ ԱՄՆ նախագահ Դոնալդ Թրամփը հայտարարել է, որ Պուտինը լուրջ հետևանքների կբախվի, եթե շարունակի պատերազմը։

Նա նաև ընդգծել է, որ Ուկրաինայի անվտանգության երաշխիքների մասին խոսելիս ինքը կողմ է եվրոպական երկրների հետ համատեղ անվտանգության երաշխիքներ տրամադրելուն, բայց դեմ է այդ աշխատանքը ՆԱՏՕ-ի բլոկի տեսքով կազմակերպելուն։

ԱՄՆ առաջնորդը նշել է, որ Ռուսաստանի և Ուկրաինայի միջև տարածքային փոխանակումը բաց է քննարկման համար, սակայն փոխանակման վերաբերյալ ցանկացած որոշում կկայացնի Ուկրաինան։

«Խաղադրույքները բարձր են»,- հավելել է  Թրամփը Պուտինի հետ հանդիպումից առաջ։

Ուկրաինայի նախագահ Վլադիմիր Զելենսկին էլ իր հերթին արձագանքել է․ «Խաղադրույքները իսկապես բարձր են․ ժամանակն է վերջ տալ պատերազմին։ Գլխավորն այն է, որ այս հանդիպումը բացում է իրական ուղի դեպի ազնիվ խաղաղություն և առաջնորդների միջև առարկայական զրույց եռակողմ ձևաչափով»։