Ճապոնիայի վարչապետը Կիևում է
Ճապոնիայի վարչապետ Ֆումիո Կիշիդան այցով ժամանել է Կիև։ Ճապոնական NHK հեռուստաալիքը կադրեր է տարածել երկաթուղային կայարանից, որտեղ Ճապոնիայի կառավարության ղեկավարին դիմավորել են, մասնավորապես, Ուկրաինայի ԱԳ նախարարի առաջին տեղակալ Էմինե Ջապարովան և Ուկրաինայում Ճապոնիայի դեսպան Կունինորի Մացուդան, գրում է kommersant.ru-ն:
Ֆումիո Կիշիդայի Ուկրաինա այցի մասին նախկինում պաշտոնապես չէր հաղորդվել։ Հեռուստաալիքի տվյալներով՝ Կիշիդան Ուկրաինա այցելելու հրավեր է ստացել նախագահ Վլադիմիր Զելենսկիից՝ հունվարին կայացած հեռախոսազրույցի ժամանակ։ Սպասվում է, որ այսօր՝ մարտի 21-ին, Ուկրաինայի նախագահը և Ճապոնիայի վարչապետը հանդիպում կունենան և կքննարկեն ենթակառուցվածքների վերականգնման հարցում Ուկրաինային տրամադրվող օգնությունը։
Սա Կիշիդայի առաջին այցն է Ուկրաինա՝ ռուսական ռազմական գործողության սկզբից ի վեր։ Այն տեղի է ունենում Չինաստանի ղեկավար Սի Ծինփինի՝ Ռուսաստան կատարած այցի ֆոնին։
