ՌԴ Քննչական կոմիտեն գործ է հարուցել Հաագայի դատախազի և դատավորների դեմ
Ռուսաստանի Դաշնության Քննչական կոմիտեն քրեական գործ է հարուցել Միջազգային քրեական դատարանի (ՄՔԴ) դատախազի եւ դատավորների դեմ, որոնք ՌԴ նախագահ Վլադիմիր Պուտինին կալանավորեու հրամանագիր են տվել։ Այս մասին երկուշաբթի հայտնել է ՌԴ ՔԿ մամուլի ծառայությունը։
«Ռուսաստանի Քննչական կոմիտեն քրեական գործ է հարուցել Միջազգային քրեական դատարանի դատախազ Քարիմ Ահմադ Խանի (Karim Ahmad Khan), Միջազգային քրեական դատարանի դատավորներ Տոմոկո Ականեի(Tomoko Akane), Ռոզարիո Սալվատորե Այտալայի (Rosario Salvatore Aitala) եւ Սերխիո Խերարդո Ուգալդե Գոդինեսի(Sergio Gerardo Ugalde Godinez) դեմ»,- նշել են ՔԿ-ում։
ՔԿ-ն հիշեցրել է, որ մարտի 22-ին ՄՔԴ-ի դատախազ Քարիմ Ահմադ Խանը, քրեական հետաքննության շրջանակում, միջնորդություն է ուղարկել Միջազգային քրեական դատարանի Նախնական վարույթի II պալատ՝ Ռուսաստանի Դաշնության քաղաքացիների կալանքի հրամանագիր ստանալու համար: Այս միջնորդության հիման վրա ՄՔԴ դատավորները Ռուսաստանի Դաշնության Նախագահին եւ Նախագահի Երեխաների իրավունքների հարցերով լիազորին կալանավորելու անօրինական որոշումներ են կայացրել։
«Քրեական հետապնդումն ակնհայտ անօրինական բնույթ ունի, քանի որ քրեական պատասխանատվության ենթարկելու հիմքեր չկան»,- ընդգծել են Քննչական կոմիտեից։
