«Արդեն 3 օր է՝ գյուղի ուղղությամբ թշնամու շարժն ակտիվացել է». Կութի բնակիչ

Գեղարքունիքի մարզի Կութ գյուղի բնակիչ Զմրուխտ Գևորգյանը 168.am-ի հետ զրույցում հայտնել է, որ թեպետ տևական ժամանակ է՝ թշնամին իրենց գյուղի ուղղությամբ չի կրակում, սակայն վերջին օրերին ակտիվություն են նկատում: 

Կնոջ խոսքով՝ հատկապես գիշերային ժամերին են նկատում թշնամու տեխնիկայի շարժը, քանի որ սարերի վրա երթևեկող մեքենաների լույսերն ավելի պարզ են երևում: 

«Արդեն 3 օր է՝ մեր գյուղի ուղղությամբ թշնամու շարժն ակտիվացել է: Կոնկրետ երեկ էլի ուժեղ շարժ կար, երեխեքն էլ էին նկատել: Մեքենաների գնալ-գալը պարզ տեսնում ենք, երևի բան-ման են հանում սարերի վրա, ժամը 21:30-ից շարժն ակտիվանում է, երևում է, թե քանի «Ուրալ» բարձրացավ, քանի հատ իջավ»,- ասել է Կութի բնակիչը:

Հիշեցնենք՝ Պատգամավոր Թագուհի Թովմասյանը ասել էր, որ  նկատելի են ադրբեջանական զինուժի և ծանր տեխնիկայի կուտակումներ Հայաստանի և Արցախի սահմաններին։

Ավելի վաղ տեղեկացրել էինք՝  ՊՆ նախարար Սուրեն Պապիկյանը լրագրողների հետ զրույցում նշել էր, որ Հայաստանի  սահմաններին կուտակումներ չկան։