Հայտնաբերվել է զինծառայողի դի՝ մահացու հրազենային վիրավորումով. ԱԱԾ-ն և ՔԿ-ն դեպքի մասին
Քիչ առաջ հայտնեցինք, որ ըստ մամուլի հրապարակման Որոտան համայնքում սահմանապահ է ինքնասպան եղել: Նշվում էր, որ ինքնասպան եղած անձն Աբովյանից էր, որտեղ երեկ հուղարկավորել են սահմանապահին։
Auroranews.am-ը կապ հաստատեց ԱԱԾ մամուլի բաժնի հետ, որտեղից հաստատեցին սահմնապահի մահվան լուրը` նշելով, որ դեպքը տեղի է ունեցել շաբաթ օրը` մարտի 11-ին:
Քննչական կոմիտեի մամլո խոսնակ Գոռ Աբրահամյանն էլ մանրամասներ ներկայացրեց դեպքից: Մասնավորապես, մարտի 11-ին N զորամասի սահմանապահ ուղեկալներից մեկի մշտական տեղակայման վայրում հայտնաբերվել է պարտադիր ժամկետային զինծառայող Ա․ Գևորգյանի դին՝ գլխի շրջանում մահացու հրազենային վիրավորումով։
Դեպքի առթիվ ՀՀ ՔԿ ԶՔԳՎ իններորդ կայազորային քննչական բաժնում նախաձեռնվել է քրեական վարույթ՝ ՀՀ քրեական օրենսգրքի 522-րդ հոդվածի 1-ին մասի հատկանիշներով։ Ակտիվ քննչական և վարութային գործողությունները շարունակվում են՝ կատարվածի հանգամանքները պարզելու նպատակով։ Իրականացվել է դեպքի վայրի զննություն, պահանջվել և ստացվել են անհրաժեշտ փաստաթղթեր, օպերատիվ հետախուզական միջոցառումներ անցկացնելու հանձնարարություն է տրվել հետաքննության մարմնին։ Նշանակվել են մի շարք փորձաքննություններ, հարցաքննվել են բազմաթիվ անձինք, զինծառայողներ։
