Աննա Հակոբյանի ազգականը Գյումրու փոխքաղաքապետ է դարձել

Գյումրու ավագանու հերթական նիստի ժամանակ այսօր 21 կողմ, 4 դեմ և 3 ձեռնպահ ձայների հարաբերակցությամբ փոխքաղաքապետ է ընտրվել Վահագն Մկրտչյանը:

«Իմ տոհմը քաղաքում ունի 200 և ավելի տարվա պատմություն, և դա է պատճառներից մեկը, որ Գյումրին համարում եմ իմ օջախը։ Իմ գործունեությունը միտված է լինելու միայն ի շահ քաղաքի, ի շահ գյումրեցու ու հնամենի քաղաքի երբեմնի փառքի վերականգնման»,- ասել է Վահագն Մկրտչյանը:

Վահագն Հրաչի Մկրտչյանը 28 տարեկան է, մասնագիտությամբ ատամնաբույժ: Հաղորդվում է, որ  նա ՀՀ վարչապետ Նիկոլ Փաշինյանի տիկնոջ` Աննա Հակոբյանի ազգականն է։

Լրագրողների հետ զրույցում նա հաստատեց, որ ազգակցական կապ ունի Աննա Հակոբյանի հետ:

«Այո, կապ կա Աննա Հակոբյանի հետ, հաստատում եմ, չեմ ժխտում, թե՛ մեր քաղաքը, թե՛ մեր երկիրը էնքան փոքր են, ցավոք սրտի, դրա համար եթե գտնենք մարդ, որն ընդհանրապես ազգակցական կապ կամ ընկերական կամ մտերմիկ հարաբերություններ չունի ինչ-որ մի պաշտոնյայի կամ ինչ-որ մի իշխանության կամ ինչ-որ մի մարդու հետ, ինձ թվում է դա բացառված է»,- նշել է նա։