ՏԵՍԱՆՅՈՒԹ․ Թբիլիսիում ոստիկանները սկսել են ռետինե փամփուշտներ կիրառել․ Զուրաբիշվիլին դիմել է ցուցարարներին
Վրաստանի նախագահ Սալոմե Զուրաբիշվիլին, որը այժմ գտնվում է ԱՄՆ-ում, Վրաստանում անցկացվող ցույցերի ֆոնին չեղարկել է նախատեսված հանդիպումները և հայտնել, որ հանդես կգա վրացի ժողովրդին ուղղված ուղերձով։
Ինչպես հայտնում են ռուսալեզու և վրացական ԶԼՄ-ները՝ Զուրաբիշվիլին աջակցել է օտարերկրյա գործակալների մասին օրինագծի դեմ ցույցի դուրս եկած քաղաքացիներին և խոստացել վետո դնել օտարերկրյա գործակալների մասին օրենքի վրա։
Նա նշել է, որ «նրանք, ովքեր այսօր կողմ են քվեարկել այս օրենքին, խախտում են սահմանադրությունը»։
Թբիլիսիի ոստիկանությունը սկսել է ռետինե փամփուշտներ կիրառել այն բանից հետո, երբ նրանց վրա Մոլոտովի կոկտեյլներ են թռչել։
Ինչպես հայտնել էինք՝ Թբիլիսիում ցուցարարները Մոլոտովի կոկտեյլներ են նետել ոստիկանների ուղղությամբ։ Ջրցան մեքենաներն ու արցունքաբեր գազը, որոնցով ոստիկանները փորձել են ցրել օտարերկրյա գործակալների մասին օրենքի ընդունման դեմ փողոց դուրս եկած ցուցարարներին, ցանկալի արդյունք չեն ունեցել։ Վրաստանի մայրաքաղաքում ամբոխը սկսել է Մոլոտովի կոկտեյլներ նետել ուժայինների ուղղությամբ։
