Դեպքի վայր պետք է ուղարկվի միջազգային քննչական խումբ․ ֆրանսիացի պատգամավորը՝ ադրբեջանական դիվերսիայի մասին
Դեպքի վայր պետք է ուղարկվի միջազգային քննչական խումբ։ Այս մասին թվիթերյան իր էջում գրել է ֆրանսիացի պատգամավոր Անն Լոուրանս Պետելը՝ այսպիսով մեկնաբանելով ադրբեջանցի դիվերսանտների կողմից իրականացված ահաբեկչական գործողությունը, որի հետևանքով զոհվել է Ոստիկանության 3 ծառայող, ևս մեկ ծառայող ստացել է կրծքավանդակի հրազենային վիրավորում։
«Դատապարտում եմ անթույլատրելի դարանակալումը, որը Լեռնային Ղարաբաղում խլեց 3 ոստիկանի կյանք։ Ադրբեջանը պետք է հարգի Արդարադատության միջազգային դատարանի որոշումը և ապահովի ազատ տեղաշարժը Լաչինի միջանցքում։
Միջազգային քննչական խումբ պետք է ուղարկվի դեպքի վայր»,- գրել է նա։
Հիշեցնենք, որ Արցախի «Խայփալու» կոչվող տեղանքում մարտի 5-ի առավոտյան ադրբեջանական զինուժի դիվերսիոն խմբի կրակից զոհվել է Ոստիկանության 3 ծառայող՝ փոխգնդապետ Արմեն Մայորի Բաբայանը, մայոր Դավիթ Վալերիի Դանիելյանը, լեյտենանտ Արարատ Թելմանի Գասպարյանը: Եվս մեկ ծառայող՝ լեյտենանտ Դավիթ Աշոտի Հովսեփյանը, ստացել է կրծքավանդակի հրազենային վիրավորում և գտնվում է Հանրապետական բժշկական կենտրոնում:
