ՏԵՍԱՆՅՈՒԹ․ Բակի կռիվ չի, որ գնանք կողքը կանգնենք․ ասում ենք՝ բանակցեք իրար հետ․ ՔՊ-ական պատգամավորը՝ Արցախը Ադրբեջանից պաշտպանելու մասին

Մեր գործընկերների հետ եկել ենք համաձայնության, որ Արցախը և Ադրբեջանը պետք է բանակցեն իրենց ապագայի շուրջ։ ՔՊ-ական պատգամավոր Վիգեն Խաչատրյանը այս մասին ասել է Mediahub.am-ի հետ զրույցում։

«Սա Ադրբեջանը դիտարկում է որպես ինտեգրացիա, այսինքն չի ընդունում, որ այդտեղ չկա քաղաքական միավոր։ Արցախը դիմագրավում է և ճիշտ է անում, ասում է՝ մենք ինքնորոշվել ենք և պետք է խոսենք մեր ինքնորոշման իրավունքի շուրջ։ Մենք ասել ենք,որ Արցախին ոչինչ չենք կարող պարտադրել։ Արցախը ինչ որոշի, մենք կպաշտպանենք նրա որոշումը»,- ասել է նա։

Այն հարցին, թե ինչպես է Հայաստանը Ադրբեջանի հետ միայնակ թողնում Արցախին, երբ Ադրբեջանը բացահայտ էթնիկ զտման քաղաքականություն է վարում, իսկ Արցախը մեկուսի չի կարող պաշտպանվել, պատգամավորը նկատել է․ «Բակի կռիվ չի, որ գնանք կողքը կանգնենք»։

«Արցախը ինքնահռչակ պետություն է, որին ոչ ոք չի ճանաչում, Ադրբեջանը նույնպես։ Մենք էլ հասել ենք նրան, որ ասում ենք՝ եկեք, միմյանց հետ բանակցեք։ Բաքուն է հրաժարվում բանակցել Արցախի հետ», ասել է նա։