Ուկրաինան այժմ ավելի բարենպաստ պայմաններ ունի բանակցությունների համար․ Լուկաշենկո
Բելառուսի նախագահ Ալեքսանդր Լուկաշենկոն ասել է, որ այսօր Ուկրաինան ավելի բարենպաստ պայմաններ ունի խաղաղ բանակցություններ վարելու համար։ Այս մասին Լուկաշենկոն հայտարարել է բելառուս եւ օտարերկրյա լրագրողների հետ հանդիպմանը, փոխանցում է BelTA-ն։
Բելառուսի ղեկավարը նշել է, որ յուրաքանչյուր պատերազմ ավարտվում է խաղաղությամբ։
«Այժմ ավելի բարենպաստ պայմաններ են ստեղծվել Ուկրաինայի համար։ Վերջացրեք այս պատերազմը և առաջ գնացեք»,- ասել է նա:
Լուկաշենկոն վստահություն է հայտնել, որ եթե Ուկրաինան իսկապես սկսի խաղաղ բանակցություններ, բոլորը կաջակցեն նրան։
«Ես կլինեմ առաջինը, ով կնստի բանակցությունների սեղանի շուրջ»,- եզրափակել է Բելառուսի ղեկավարը։
Ավելի վաղ Ալեքսանդր Լուկաշենկոն պատմել էր, թե ինչ պայմաններում Բելառուսը կարող է հակամարտության մեջ մտնել Ուկրաինայում Ռուսաստանի Դաշնության կողմից։
Նա ընդգծել է, որ Մինսկը պատրաստ կլինի հակամարտության մեջ մտնել միայն այն դեպքում, եթե Բելառուսի նկատմամբ ագրեսիա ցուցաբերվի։
