Պուտինը խոստացել է չսպանել Զելենսկուն. ինչ է հայտարարել Իսրայելի նախկին վարչապետը

Իսրայելի նախկին վարչապետը հայտարարել է, որ Պուտինը խոստացել է իրեն՝ չսպանել Զելենսկուն: 

Իսրայելական 12-րդ ալիքին տված հարցազրույցում Նաֆտալի Բենեթը, որը գլխավորել է երկրի կառավարությունը 2021-2022 թվականներին, պատմել է, որ այդ հարցը քննարկել Է ՌԴ նախագահի հետ, երբ Մոսկվա էր ժամանել 2022 թվականի մարտին։ Բենեթի կողմից YouTube-ի իր ալիքում հրապարակված հարցազրույցում նա ասել է, որ Ուկրաինայում հատուկ գործողության մեկնարկից հետո Զելենսկին խնդրել է իրեն կապ հաստատել ՌԴ նախագահի հետ։

Բենեթի խոսքով՝ Պուտինի հետ հանդիպումից հետո նա զանգահարել է Զելենսկիին, որը թաքնվում էր բունկերում և փոխանցել Ռուսաստանի ղեկավարի հետ զրույցի բովանդակությունը։ Տեղեկանալով Պուտինի խոստման մասին՝ Զելենսկին վերադարձել է գրասենյակ և այնտեղ տեսահոլովակ նկարահանել։

Բենեթը, ով հատուկ գործողության սկզբում հանդես էր գալիս որպես միջնորդ Ռուսաստանի Դաշնության և Ուկրաինայի միջև, ասել է, որ բանակցություններն չեղարկվել են արևմտյան երկրների կողմից։

Իսրայելի նախկին վարչապետը հավելել է, որ իր բոլոր գործողությունները համաձայնեցված են եղել ԱՄՆ-ի, Գերմանիայի և Ֆրանսիայի հետ։