Թուրքիայի ներքին գործերի նախարարն Արևմուտքին մեղադրել է «հոգեբանական պատերազմ» վարելու մեջ

Արևմտյան երկրները «հոգեբանական պատերազմ» սկսեցին Թուրքիայի դեմ՝ փակելով դիվանագիտական ներկայացուցչությունները ահաբեկչական սպառնալիքի պատրվակով։ Այս մասին հայտարարել է այդ երկրի ՆԳՆ ղեկավար Սուլեյման Սոյլուն։ Նախարարն ասել է․ «Ամերիկան և Արևմուտքը չեն ցանկանում Թուրքիայի ազատությունն ու անկախությունը, և նրանք սկսեցին այս հոգեբանական պատերազմը այն օրը, երբ մենք հայտարարեցինք, որ նախատեսում ենք ընդունել 60 միլիոն զբոսաշրջիկների և ստացել ենք 46 միլիարդ դոլար զբոսաշրջության եկամուտ»:

Նրա խոսքով՝ Թուրքիայում ահաբեկչական հարձակումների սպառնալիքի պատճառով իրենց դիվանագիտական ներկայացուցչությունները փակող երկրներից որևէ մեկը չի կապվել իրենց անվտանգության համար պատասխանատու գերատեսչությունների հետ։ 

Ավելի վաղ Գերմանիան, հետևելով ԱՄՆ-ին և Ֆրանսիային, զգուշացրել էր իր քաղաքացիներին Թուրքիայում հնարավոր ահաբեկչությունների մասին։ Մինչ այս Թուրքիայի արտգործնախարարությունը հայտարարել էր, որ Անկարան դատապարտում է Դանիայում Ղուրանի այրումը և կոչ է անում եվրոպական վարչակազմերին արձագանքել նման գործողություններին։

Ավելի վաղ էլ թուրքական TRT լրատվական գործակալությունը հայտնել էր, որ շվեդ քաղաքական գործիչ Ռասմուս Փալուդանը Դանիայի մայրաքաղաքում մզկիթի դիմաց Ղուրան է այրել։ Ոստիկաններով շրջապատված քաղաքական գործիչը սաղավարտով հանրահավաք է անցկացրել Կոպենհագենի Դորտեվեյ թաղամասում ուրբաթօրյա աղոթքի ավարտից անմիջապես հետո։