Թրամփը Պուտինի մասին խոսելով վարկաբեկել է ԱՄՆ հետախուզությանը

ԱՄՆ նախկին նախագահ Դոնալդ Թրամփը հայտարարել է, որ ավելի շատ վստահում է Ռուսաստանի նախագահ Վլադիմիր Պուտինին, քան ամերիկյան հետախուզությունում աշխատող «տականքներին», «Truth Social» սոցիալական ցանցում նրա ուղերձը մեջբերել է Newsweek-ը։

Ուղերձում նախկին նախագահը անդրադարձել է 2018 թվականին Հելսինկիում Պուտինի հետ հանդիպումից հետո իր արած մեկնաբանություններին, երբ նա ասել է, որ պատճառ չի տեսնում, որ Ռուսաստանը միջամտի 2016 թվականի ընտրություններին, չնայած Հետաքննությունների դաշնային բյուրոյի մեղադրանքներին:

«Հիշում եք Հելսինկիում մի լրագրողի, որն ինձ հարցնում էր, թե հիմնականում ում եմ ավելի շատ վստահում՝ Ռուսաստանի նախագահ Պուտինի՞ն, թե՞ մեր «հետախուզական» սրիկաներին: Այն ժամանակ ես զգում էի, որ մենք շատ վատ մարդիկ ունեինք ՝ ի դեմս Ջեյմս Քոմիի, Մաքքեյբի (որի կնոջը օգնում էր ծուռ Հիլարին)», - հրատարակությունը մեջբերում է Թրամփի խոսքերը։ 

Այնուհետ Թրամփը հարցրել է ընթերցողներին, թե ում կընտրեն՝ Պուտինի՞ն, թե՞ «այս տականքներին»:

Ռուսաստանը բազմիցս հերքել է ԱՄՆ-ի մեղադրանքներն իրենց գործերին խառնվելու, այդ թվում նաև՝ ԱՄՆ ընտրություններին միջամտելու վերաբերյալ։ Ռուսաստանի նախագահի մամուլի քարտուղար Դմիտրի Պեսկովը դրանք անվանել է «բացարձակապես անհիմն»։ ՌԴ ԱԳ նախարար Սերգեյ Լավրովը, խոսելով տարբեր երկրներում ընտրություններին Ռուսաստանի ենթադրյալ միջամտության մասին, հայտարարել է, որ դա հաստատող փաստեր չկան։