Ադրբեջանը երեկ մենակ էր մնացել. Մամիջանյանը` ԵԽԽՎ-ի թեժ քննարկման մասին
Եվրոպայի խորհրդի խորհրդարանական վեհաժողովը երեկ քննարկում անցկացրեց Լաչինի միջանցքի շրջափակման մարդասիրական հետևանքների թեմայով:
ArmLur.am-ը մանրամասների վերաբերյալ զրուցել է «Պատիվ ունեմ» խմբակցության ղեկավար, ԵԽԽՎ պատվիրակության անդամ Հայկ Մամիջանյանի հետ:
Պատգամավորի խոսքով՝ գրեթե բոլոր երկրները քննարկման ժամանակ արձանագրեցին, որ Լաչինում ստեղծված ճգնաժամի պատասխանատուն Ադրբեջանն է: Նա իր խոսքում նշել է` Ադրբեջանը երեկ մենակ էր մնացել:
Հիշեցնենք, որ ԵԽ խորհրդարանական վեհաժողովը հունվարի 26-ին ընդունել է «Առաջընթացը Վեհաժողովի մոնիտորինգային գործընթացներում» բանաձևը։ Տեղեկությունը հրապարակվել է «Հայաստանը Եվրոպայի խորհրդում» ֆեյսբուքյան էջում։
«Քվեարկությամբ ընդունվեցին բանաձևում հայկական պատվիրակության կողմից առաջարկված փոփոխությունները՝ Ադրբեջանի կողմից հայ ռազմագերիներին անհապաղ ազատ արձակելու և Լաչինի միջանցքի առնչությամբ Մարդու իրավունքների եվրոպական դատարանի միջանկյալ միջոցները կատարելու վերաբերյալ»,– ասված է հաղորդագրությունում։
