Հնարավորություն կա համաձայնեցնել ԵԱՏՄ գազի ընդհանուր շուկայի պայմանագրի տեքստը. Օվերչուկ

ԵԱՏՄ գազի ընդհանուր շուկայի վերաբերյալ պայմանագրի տեքստի համաձայնեցման հնարավորություն կա։ Այս մասին հայտնում է РИА Новости-ն` վկայակոչելով ՌԴ կառավարության փոխնախագահ Ալեքսեյ Օվերչուկին:
 

«Մենք քննարկել ենք այդ թեման, և այսօր էլ շարունակել ենք քննարկել այն։ Հնարավորություն ունենք հասնել նրան, որ համաձայնեցվի պայմանագրի տեքստը», – լրագրողների հետ զրույցում ասել է նա` շարունակելով, որ այսօր փորձագետները շարունակել են աշխատանքը:
 

Այնուամենայնիվ Օվերչուկը չի նշել այդ աշխատանքների ավարտի հնարավոր ժամկետները։ Ըստ նրա` Մոսկվան ԵԱՏՄ–ում իր նախագահության տարում շահագրգիռ է զարգացնել միության ինտեգրացիոն գործընթացները, տրանսպորտային և լոգիստիկ միջանցքները։ Նա նշել է, որ կողմերը քննարկում են նաև ֆինանսական ենթակառուցվածքների, միացյալ էներգետիկ շուկաների ստեղծմանը և զարգացմանը վերաբերող հարցեր:

«Այս տարվա համար մեծ ծրագիր ենք կազմել», – ասել է Օվերչուկը: 

Հիշեցնենք, որ ԵԱՏՄ անդամ են հանդիսանում Հայաստանը, Բելառուսը, Ղազախստանը, Ղրղզստանն ու Ռուսաստանը։