ՏԵՍԱՆՅՈՒԹ. Սիմոնյանը դեպքի մանրամասների մասին տեղեկացել է հրդեհից տուժած զինծառայողներից. ի՞նչ է ասում ԱԺ նախագահը

 ԱԺ նախագահ Ալեն Սիմոնյանն այսօրվա ճեպազրույցի ընթացքում անդրադարձել է հունվարի 19-ին Գեղարքունիքի մարզում տեղակայված զորամասի ինժեներասակրավորային վաշտի կացարանում բռնկված հրդեհի դեպքին, որի հետևանքով 15 զինծառայող զոհվեց: Հարցին՝ «հրդեհի բռնկման պատճառների վերաբերյալ մանրամասներին իշխանության ներկայացուցիչները տեղեկացել են հրդեհից փրկված վիրավորների՞ց, թե՞ Քննչական կոմիտեից», Սիմոնյանն արձագանքել է, որ ինքն անձամբ է հանդիպել երեք զինծառայողներին. 

 

«Նաև իրենց պատմածներից էր, չեմ ուզում շատ բաներ պատմել, որովհետև անձնական զրույց է եղել, թող նախաքննությունն ընթանա, վստահեցնում եմ ձեզ՝ բոլոր մեղավորները քրեաիրավական պատասխանատվություն կկրեն»,- նշել է նա:

 

Հարցին՝ քաղաքական պաշտոններ զբաղեցնող անձիք, ինչպես օրինակ պաշտպանության նախարար Սուրեն Պապիկյանը, կրե՞ն պատասխանատվություն, Սիմոնյանը ասաց․

 

«Պաշտպանության նախարարը որևէ ձևով այս ամեն ինչի հետ չի կարող կապ ունենալ, որովհետև իր գործառույթի մասով ինքն իր աշխատանքը ամբողջովին արել է։ Այդ քաղաքական սակարկումները շատ սին և անտեղի եմ համարում: Այն բարեփոխումները, որ պարոն Պապիկյանն իրականացնում է և նաև այն պատասխանատվությունը, որ նա իր վրա վերցրել է պատերազմից հետո, համաձայնություն տալով այդ վիճակում բանակը վերցնելու և բարեփոխումներ սկսելու: Բարեփոխումներ են արվել՝ սկսած անձնականից, վերջացած կահավորումից, որը փոխվել և փոխվում է։ 2018թ-ից սկսած չի եղել որևէ դեպք, որ գումարի պատճառով որևէ գնում չարվի՝ սկսած վերելակից, վերջացրած գրիչից»,- ասաց ԱԺ նախագահը։

 

Դիտարկմանը՝ ինչո՞ւ պատերազմից հետո չեն իրականացվել համապատասխան շինարարական աշխատանքներ զինծառայողներին մոդուլային զորանոցներում տեղավորելու համար, Սիմոնյանն ասաց․

 

«Դա շինարարական ջոկատ էր, որի անմիջապես կողքը կա մոդուլային տնակ։ Այդ տնակի ամենամեծ խնդիրը եղել է այն, որ չի պահպանվել անվտանգության կանոնները։ Մարդիկ, ովքեր պատասխանատու են եղել անվտանգության համար, պատասխանատվություն են կրելու։ Դժբախտ պատահարը դարձնել քաղաքական շահարկման թեմա, անտեղի եմ համարում»։

Քաղաքականություն

Պատահարներ