Ինձ մոտ հարց առաջացավ՝ Նիկոլ Փաշինյանը կոմունալ ծախսեր է վճարո՞ւմ. Սերժ Սարգսյանի փաստաբանը` դատախազության քննության մասին
Այսօր դատարանում քննվել է Սերժ Սարգսյանի Սերժ Սարգսյանի, Անուշ Մինասյանի, Սաթենիկ Սարգսյանի՝ ապօրինի ծագում ունեցող գույքի բռնագանձման պահանջի մասին դատախազության հայցը: ՀՀ երրորդ նախագահի փաստաբան Ամրամ Մակինյանը, անդրադառնալով ավելի վաղ Սարգսյանի գույքի ուսումնասիրման առնչությամբ Դատախազության ներկայացրած կանխավարկածին, նշել է. «չենք պատրաստվում խելագարության վարկածով որեւէ բան հիմնավորել»:
«Դատախազությունն ասում է՝ 1991 թվականին բոլոր աշխատած գումարները վերացել են, նշում է՝ մենք այդ կանխավարկածով ենք գործում, մենք էլ ասում ենք՝ չենք պատրաստվում խելագարության վարկածով որեւէ բան հիմնավորել»,- ասել է նա,- «Դատախազությանը ժամանակին այս պրոցեսի ծայրահեղ անօրինական լինելու մասին առարկություններ ենք ներկայացրել: Այս իշխանությունները երբ 2020 թվականի հոկտեմբերի 7-ին ինչ ծանր դրության մեջ էինք, ինչ մարտեր էին Արցախի Հանրապետության սահմաններին, այդ օրը ապօրինի ծագում ունեցող գույքի բռնագանձման խայտառակ ապօրինի պրոցես էին սկսում ՀՀ երրորդ նախագահի նկատմամբ: Այն ժամանակ, երբ այս պրոցեսը սկսվել է, այդ որոշման կայացման համար այդ նույն ապօրինի օրենքով չեն եղել հիմքեր, այսինքն՝ գործում առկա է փաստական տվյալներ, որ ուսումնասիրությունը սկսելու ժամանակահատվածում Սերժ Սարգսյանի անունով ընդհանրապես որեւէ գույք չի եղել հայտնաբերված»:
Փաստաբանի խոսքով՝ այն օրենքները, որոնք գրվում են, օրինական լինելուց բացի պետք է նաեւ բարոյական լինեն. «Բարոյականության հետ բավականին հակասություն եմ տեսնում, երբ երջանկահիշատակ տիկնոջ կատարված ծախսերի պատասխաններն են մեզնից ակնկալում: Ո՞նց կարող են մահացածների ծախսերը հարցնել ողջերից»:
Ճշտող հարցին՝ այսինքն երրորդ նախագահի մասով որևէ գումար և գույք չի՞ եղել, Մակինյանն ասել է՝ այո:
Անդրադառնալով երրորդ նախագահի դստեր՝ Սաթենիկ Սարգսյանի, գույքի ուսումնասիրմանը՝ Մակինյանն ասել է, որ խոսքը մի տան մասին է, որտեղ Սաթենիկ Սարգսյանն իր ընտանիքով մինչեւ այսօր ապրում է:
«ՀՀ պետական մարմիններն ինչ են որոշել, որ մարդուն իր բնակարանից վտարեն՝ առանց փաստական տվյալի»,- ասել է նա: Իր խոսքով` դատախազը խոսում է նաեւ կոմունալ ծախսերի մասին. «Եթե այս պրոցեսը ոչ թե պատվերով ուսումնասիրվեր, այլ նորմալ, կտեսնեին, որ ՀՀ երրորդ նախագահը 1993 թվականից մինչեւ 2018 թվականը բնակվել է կառավարական ամառանոցներում: Այստեղ կոմունալ ծախսեր չկան: Ինձ մոտ հարց առաջացավ՝ Նիկոլ Փաշինյանը կոմունալ ծախսեր է վճարո՞ւմ»:
