Պուտինը շուտով կարող է հայտարարել մոբիլիզացիայի 2-րդ ալիքի մասին. կզորակոչվի մինչև կես միլիոն մարդ. The Times

Արեւմտյան հետախուզությունը կարծում է, որ ՌԴ նախագահ Վլադիմիր Պուտինը շուտով կարող է հայտարարել մոբիլիզացիայի երկրորդ ալիքի մասին, որի ընթացքում կզորակոչվի մինչեւ կես միլիոն մարդ։ Այս մասին հայտնում է The Times-ը՝ հղում անելով աղբյուրներին։

Ըստ թերթի, Պուտինը առաջնորդվում է հարցումներով, որոնք ցույց են տալիս, որ ռուսական հասարակությունն ակտիվորեն աջակցում է Ուկրաինայում ռազմական հակամարտությանը՝ չնայած ճակատում գրանցված անհաջողություններին։ Թե ինչպիսի հարցումների մասին է խոսքը, ըստ որի ռուս հասարակությունը աջակցում է պատերազմին, The Times-ը չի հստակեցնում։

«Ռուսաստանի տարածքային զինկոմիսարիատներում լուրջ նախապատրաստական ​​աշխատանքներ են տարվում։ Կրեմլը փակ հարցում է անցկացրել: Ռուսները զբաղված են պատերազմով, նրանք չեն ցանկանում ընդունել պարտությունը»,- ասել է արևմտյան մի պաշտոնյա, որի անունը չի նշվում:

Եթե ​​նոր մոբիլիզացիա անցկացնելու որոշումը կայացվի առաջիկա մի քանի շաբաթվա ընթացքում, ապա մինչև ապրիլ 500.000 մոբիլիզացված կարող է ուղարկվել ռազմաճակատ, և այդ ժամանակ գարնանային հալոցքը կավարտվի, հողը կչորանա, և Ռուսաստանը կկարողանա նոր հարձակման մեկնարկը տալ, նշում է The Times-ը:

Ռազմական փորձագետները կարծում են, որ Մոսկվան գարնանը կսկսի բազմակողմ հարձակում, որը պետք է շեղի ուկրաինական զորքերը Դոնեցկից և Լուգանսկից։ Բացի այդ, ըստ The Times-ի, Ռուսաստանը կարող է նոր հարձակում կազմակերպել Ուկրաինայի հյուսիսի վրա Բելառուսի տարածքից։ Սակայն նման գործողությունները դժվար թե հանգեցնեն նրան, որ ռուսական զորքերը կկարողանան վերահսկողության տակ առնել ավելի շատ տարածքներ, սակայն հնարավոր է, որ Ռուսաստանը կարողանա «քաշել ուկրաինական ռեսուրսները» հիմնական պատերազմական գոտիներից, նշում է թերթը։