Թուրքիան կփակի սիրիական սահմանի 30 կիլոմետրանոց բացը. Էրդողան

Թուրքիան նոր միջոցներ կձեռնարկի Սիրիայի հետ սահմանին 30 կիլոմետրանոց բացը փակելու համար, որը ահաբեկչության վտանգ է ներկայացնում։ Այս մասին երկուշաբթի հայտարարել է Թուրքիայի նախագահ Ռեջեփ Թայիփ Էրդողանը երկրի կառավարության նիստից հետո, որն անցկացվել է նրա նախագահությամբ։

«Սիրիայից եկող ահաբեկչության սպառնալիքը ամբողջությամբ վերացնելու համար մենք նոր միջոցներ կձեռնարկենք՝ ուղղված 30 կիլոմետրանոց անվտանգության գոտին փակելուն»,- ասել է նա։զ

Էրդողանը ավելի վաղ հայտարարել էր Սիրիայի հյուսիսում ցամաքային գործողության Թուրքիայի պլանների մասին։
 

Ըստ թուրքական լրատվամիջոցների՝ նոր գործողությունը Անկարային թույլ կտա վերահսկողություն ապահովել Սիրիայի հետ սահմանի 600 կիլոմետրանոց հատվածի վրա և նվազագույնի հասցնել հարակից տարածքից բխող ահաբեկչական սպառնալիքները։ Անկարայում ազգային անվտանգությանը սպառնացող հիմնական վտանգներն են Քրդստանի աշխատավորական կուսակցությունը և նրա սիրիական ճյուղը՝ «Ժողովրդական ինքնապաշտպանության ուժերը»: Ռազմական աղբյուրների համաձայն՝ նախատեսվում է գործողությանը ներգրավել մոտ 50 հազար թուրք զինվորականների և սիրիական զինված ընդդիմության զինյալների, որոնց աջակցում է Անկարան։
 

Թուրքիայի կողմից Սիրիայի հյուսիսում 2015 թվականից իրականացվող գործողությունների արդյունքում Հալեպի հյուսիսում գտնվող Աազազ և Ջերաբլուս քաղաքների միջև ստեղծվել է անվտանգության գոտի, օկուպացվել է Աֆրինը, իսկ Եփրատ գետից արևելք սահմանամերձ տարածքները վերցվել են վերահսկողության տակ։ .