Քերոբյանը` Լարսի անցակետում հերթերի և Հայաստանում խաղողագործության մասին

Մենք խաղողագործության զարգացումը տեսնում ենք Հայաստանում արտադրողականության բարձրացման միջոցով: Այդ մասին «Ազատության» եթերում հայտարարել է էկոնոմիկայի նախարար Վահան Քերոբյանը՝ անդրադառնալով նրան, որ շատ խաղողագործներ սկսել են քանդել իրենց այգիները, քանի որ եկամուտ չեն ստանում, ժամանակին չեն մթերում իրենց բերքը:
 

«Մենք չենք կարող տարիներով սուբսիդավորել մի բան, որն ապագա չունի: Հետեւաբար, շատ նորմալ է, որ մարդիկ քանդեն իրենց այն այգիները, որտեղ աճում է բերք, որը ցածրարժեք է եւ փոխարենը տնկեն այլ այգի, որը բարձրարժեք  բերք կտա: Գյուղատնտեսությունը բիզնես է եւ եթե ինչ-որ մի բան վաճառելիս այն օգուտ չի տալիս, պետք է փոխել վաճառքի առարկան կամ արտադրանքը եւ վաճառել այն, ինչն օգուտ է տալիս:
 

Մենք Հայաստանում խաղողագործության ապագան տեսնում ենք բարձրարժեք խաղողագործության մեջ եւ այդտեղ գինեգործություն է առաջին պլան գալիս: Մենք մշակել ենք գինեգործության ռազմավարություն, նպատակն այն է, որ առաջիկա 10 տարիների ընթացքում մենք կարողանանք կտրուկ բարձրացնել գինու արտադրանքն ու արտահանումը: Այսօր մեր գինին ունի մեծ չիրացված ներուժ ոչ միայն ՌԴ-ում, այլեւ ԱՄՆ-ում, Եվրոպայում եւ ասիական երկրներում»,-ասել է նա:

Խոսելով Լարսի անցակետում հայկական բեռնատարների հերթերի մասին` Քերոբյանը նշել է, թե կարելի է ասել, որ հիմա շատ փոքր հերթ կա այնտեղ, կարող է 1-2 օրվա հերթ լինել: Օրական հայկական բեռներով 300-ից ավելի մեքենա անցնում է դեպի Ռուսաստան, իսկ Հայաստանից դեպի Վրաստան անցնում է 200-250 մեքենա:

Դիտարկմանը, թե Վրաստանի տարածքում երեկվա դրությամբ 1000 մեքենա դեռ խցանման մեջ է, Քերոբյանը չի համաձայնել՝ նշելով, որ կարող է լինել առավելագույնը 500 մեքենա և այդ հերթը մաշվում է: