Նախկինների ժամանակ ավելի լավ չէր, ես որպես գործարար կարող եմ ասել, այդ ժամանակ բիզնես անելը անասելի ծանր գործ էր: Այս մասին «Ազատության» եթերում ասել է էկոնոմիկայի նախարար Վահան Քերոբյանը։ Նա անդրադարձել է դիտարկմանը, թե «նախկինների ժամանակ մարդիկ ավելի լավ էին ապրում»:

«Ես հիմա էլ տեսնում եմ շատ ծաղկող բիզնեսներ, որոնք սկսվել են 2018-ից հետո: Միայն իշխանափոխությունից հետո, կոռուպցիայի  նվազումից հետո են մարդիկ ձեռնամուխ եղել ձեռնարկատիրական գործունեության»,- ասել է նա:

Քերոբյանի խոսքով` իր ստեղծած բիզնեսի նկատմամբ եղել են հարկային հալածանքներ.

«Նույնիսկ օրենքներ են ստեղծվել, որ փակվի իմ բիզնեսը: Կարող եմ նույնիսկ նշել, թե ինչ օրենքներ, դա առաքվող ուտելիքի վրա ավելացված արժեքի հարկի ներդրումն է, կես տարի մենք ապրել ենք մղձավանջի մեջ: Հետո հաջողվեց փոխել այդ օրենքը դեռևս Կարեն Կարապետյանի ժամանակ»։