ԵՄ-ն Հայաստանին 34 միլիոն եվրոյի աջակցություն է տրամադրում՝ տնտեսական ճգնաժամին դիմակայելու համար

Եվրոպական միությունը Հայաստանին հատկացրել է 34 միլիոն եվրոյի անհետաձգելի ֆինանսական աջակցություն՝ մեղմելու համար մասնավոր հատվածի վրա Ռուսաստանի կողմից կիրառվող առևտրային սահմանափակումների հետևանքները։ Այս մասին հայտնում է Հայաստանում Եվրոպական միության պատվիրակությունը։

Նշվում է, որ աջակցությունը տրամադրվում է Եվրոպական հանձնաժողովի նախագահ Ուրսուլա ֆոն դեր Լայենի կողմից հայտարարված աջակցության փաթեթի շրջանակում և հանդիսանում է դրա առաջին փուլը։ Ծրագիրը նպատակ ունի խթանել Հայաստանի տնտեսական կայունությունը, աջակցել առևտրի դյուրացմանը և ամրապնդել երկրի դիմակայունությունը արտաքին մարտահրավերների պայմաններում։

ԵՄ-Հայաստան գագաթնաժողովում ձեռք բերված պայմանավորվածությունների համաձայն՝ կողմերը շարունակելու են համագործակցությունը՝ զարգացնելով գործարար կապերը և ընդլայնելով հայկական արտադրողների մուտքը նոր շուկաներ։ Լրացուցիչ աջակցություն կստանան այն ոլորտները, որոնք առավելապես տուժել են առևտրային սահմանափակումներից, այդ թվում՝ ագրոպարենային արտադրությունը, ծաղկաբուծությունը և արտահանմանն ուղղված այլ ճյուղերը։

Ծրագրի շրջանակում նախատեսվում են առևտրի խթանման նախաձեռնություններ, գործարար կապերի զարգացման միջոցառումներ և շուկաների հասանելիության ընդլայնմանն ուղղված հատուկ ծրագրեր։

ԵՄ ընդլայնման հարցերով հանձնակատար Մարթա Կոսը նշել է, որ Եվրոպական միությունը շարունակում է աջակցել Հայաստանին՝ որպես ինքնիշխան, ժողովրդավարական և անկախ պետության։

«Մենք ոչ միայն ֆինանսական աջակցություն ենք տրամադրում, այլև նպաստում ենք, որպեսզի Հայաստանը ավելի հեշտ առևտուր իրականացնի իր հարևանների և Եվրոպայի հետ։ Սա եվրոպական համերաշխության գործնական արտահայտությունն է մեր կարևոր գործընկերներից մեկի նկատմամբ»,- ընդգծել է նա։

Հայտարարվել է նաև, որ հուլիսի 5-ին Մարթա Կոսը կայցելի Հայաստան՝ քննարկելու երկկողմ համագործակցության հետագա քայլերն ու նոր նախաձեռնությունները։