Նոր սկանդալ Իրանում. հայտնի երգչուհին դատապարտվել է 74 մտրակի հարվածի

Իրանցի հայտնի երգչուհի Փարասթու Ահմադիին և նրա թիմի ութ անդամներին դատապարտել են 74 մտրակի հարվածի այն ելույթի համար, որը հեռարձակվել է Ահմադիի յութուբյան ալիքով 2024 թվականին։

Այդ ելույթի ժամանակ 29-ամյա Ահմադին, մասնավորապես, առանց հիջաբի կատարել է հայրենասիրական երգը, որն արագորեն վիրուսային է դարձել։

Տեսանյութի հրապարակումից կարճ ժամանակ անց Ահմադիին ձերբակալել են երաժիշտների հետ միասին, սակայն արագ ազատ են արձակել, և միայն որոշ ժամանակ անց է պաշտոնապես գործ հարուցվել։

Արդյունքում, Ղոմ նահանգի քրեական դատարանը արտիստներին դատապարտել է մտրակահարության, երկու տարով երկրից մեկնելու արգելքի և երկու տարով ստեղծագործական գործունեությամբ զբաղվելու արգելքի՝ համացանցում «գռեհիկ և անբարոյական բովանդակություն» ստեղծելու ու հրապարակելու միջոցով հասարակական բարոյականությունը վիրավորելու ներառյալ մեղադրանքներով։