«Փորձում են բյուզանդական ոճով գահախաղի վերածել». Էրդողանը՝ Ստամբուլի քաղաքապետի մասին
Թուրքիայի նախագահ Ռեջեփ Թայիփ Էրդողանը նախազգուշացրել է ընդդիմությանը զերծ մնալ Ստամբուլի քաղաքապետ Էքրեմ Իմամօղլուի դատավարության վերաբերյալ վաղաժամ եզրակացություններից և հորդորել է չմիջամտել արդարադատության գործերին՝ ներգրավվելով «գահերի խաղի» մեջ։
«Վերջին օրերին բորբոքված վեճերը կապված չեն մեր, անձամբ իմ կամ մեր ազգի հետ, դրանք կապված են ԿԸՀ-ին վիրավորած կոնկրետ անձի նկատմամբ կայացված դատավճռի հետ, և այն վերջնական չէ։ Սա ներքաղաքական հակասություն է, որը ինչ-որ չափով փորձում են բյուզանդական ոճով գահախաղի վերածել»,- ասել է Էրդողանը` նշելով, որ մինչ այժմ միայն առաջին ատյանի դատարանի որոշումն է կայացվել։
Հիշեցնենք՝ Ստամբուլի դատարանը Ստամբուլի քաղաքապետին դատապարտել է 2 տարի 7 ամիս 15 օր ազատազրկման՝ Կենտրոնական Ընտրական Հանձնաժողովի ներկայացուցիչներին վիրավորելու համար և արգելել քաղաքական գործունեություն իրականացնել։
Քաղաքապետը համարվում է Էրդողանի հիմնական մրցակիցը 2023թ-ի նախագահական ընտրություններում:
