«Դա մեզ ստիպում է մտածել այն մասին, թե ում հետ գործ ունենք». Պուտինը Մերկելի մասին

ՌԴ նախագահ Վլադիմիր Պուտինն ասել է, որ Գերմանիայի նախկին կանցլեր Անգելա Մերկելի՝ մինսկյան համաձայնագրերի կնքման դրդապատճառների մասին խոսքերից հետո վստահության հարց է առաջանում, սակայն անհրաժեշտ կլինի համաձայնության գալ ուկրաինական հարցում։ 

«Հիմա, իհարկե, առաջանում է վստահության հարցը, և վստահությունը, իհարկե, գրեթե զրոյական է, բայց նման հայտարարություններից հետո, իհարկե, հարց է առաջանում՝ ինչպե՞ս բանակցել և հնարավո՞ր է արդյոք  բանակցել։ Իսկ որտե՞ղ են երաշխիքները, սա է, իհարկե, հարցը»,- լրագրողներին ասել է Պուտինը։

«Բայց, միևնույն է, վերջնական արդյունքում պետք է պայմանավորվել։ Ես արդեն բազմիցս ասել եմ, որ մենք պատրաստ ենք այդ պայմանավորվածություններին, մենք բաց ենք, բայց դա մեզ ստիպում է մտածել, իհարկե, այն մասին, թե ում հետ գործ ունենք», - հավելել է երկրի նախագահը ։

Ավելի վաղ Մերկելը Zeit թերթին տված հարցազրույցում հայտարարել էր, որ 2014 թվականի Մինսկի համաձայնագիրը Ուկրաինային ժամանակ տալու փորձ էր: Նախկին կանցլերն ասել է, որ կասկածում է, որ ՆԱՏՕ-ի երկրներն այն ժամանակ կարող էին անել նույնքան, որքան հիմա են անում Ուկրաինային օգնելու համար։