«Մենք սա չենք ուզում». ԱՄՆ-ից չեն բացառում ռազմական ուժի կիրառումը Իրանի դեմ

Իրանի հարցով ԱՄՆ հատուկ ներկայացուցիչ Ռոբերտ Մալլին չի բացառել Իսլամական Հանրապետության դեմ ռազմական ուժի կիրառումը, թեև Վաշինգտոնը նախընտրում է դիվանագիտական ուղիները Թեհրանի միջուկային ծրագրի շուրջ համաձայնության հասնելու համար։ 

«Մենք սա չենք ուզում (ռազմական լուծումը), սա մեր ճանապարհը չէ, սա այն չէ, ինչ ուզում է ԱՄՆ նախագահ Ջո Բայդենը: Բայց եթե մյուս բոլոր տարբերակները ձախողվեն, որպես վերջին տարբերակ կա ռազմականը: Նախագահը հստակ ասել է՝ թույլ չի տա Իրանին միջուկային զենք ունենալ»,- ասել է նա երկուշաբթի օրը La Repubblica-ի հետ զրույցում։ 

Նա ընդգծել է, որ նախապատվությունը միշտ տրվում է դիվանագիտությանը, սակայն «Իրանը ցույց չի տալիս, որ իսկապես ցանկանում է վերադառնալ համաձայնագրին»։ 

«Եվ այժմ ավելացվում են ևս երկու կարևոր գործոն, որոնց վրա մենք կենտրոնանում ենք. դրանք են Ռուսաստանի ռազմական օգնությունը և խաղաղ ցույցերի ճնշումն է», - ասել է Մալլին՝ մատնանշելով, որ Միացյալ Նահանգների դերը «իրավունքներին և հիմնարար ազատություններին աջակցելն է։