Կիևի քաղաքապետ Վիտալի Կլիչկոն Ուկրաինայի մայրաքաղաքի բնակիչներին հորդորել է պատրաստ լինել էլեկտրաէներգիայի անջատումներին, որոնք կշարունակվեն մինչև գարուն, և չի բացառել մասնակի տարհանումը։ Այս մասին քաղաքապետը հայտարարել է РБК-Украина գործակալությանը տված հարցազրույցում, որը հրապարակվել է երկուշաբթի օրը։ Տեղեկատվությունը փոխանցում է ՏԱՍՍ-ը:

«Մենք պետք է պատրաստ լինենք նրան, որ անջատումները կարող են լինել մինչև գարուն։ Դա պայմանավորված է շատ բաներով: Ցուրտ եղանակին մարդիկ միշտ ավելի շատ էլեկտրաէներգիա են սպառում, ուստի էներգահամակարգի վրա մեծ ծանրաբեռնվածություն կա»,- ասաց քաղաքապետը։

Նա նաեւ նշել է, որ չի բացառում մայրաքաղաքի բնակչության մասնակի տարհանումը։ 

«Մենք պետք է պատրաստ լինենք տարբեր սցենարների, այդ թվում՝ վատ: Այս դեպքում մեզանից յուրաքանչյուրն ունի գործողությունների ալգորիթմ, նույնիսկ տարհանման դեպքում: Ես չեմ բացառում ամենավատ սցենարը, որը կոչվում է տարհանում: Սա ժամանակավոր է: Որոշ կատեգորիաների մարդկանց տեղափոխում արվարձաններ, որտեղ կարող են տեղակայվել ծառայություններ»,- ասել է Կլիչկոն։ 

Կլիչկոյի խոսքով՝ Կիևում այժմ բացվել է 430 ջեռուցման կետ։ Միաժամանակ, մեկնաբանելով կազմակերպչական կետերի վատ աշխատանքի մասին մեղադրանքները, նա կրկին հայտարարեց, որ հարցը քաղաքականացվում է։