Սոբչակը ներողություն է խնդրել «Ռոստեկ»-ի ղեկավարից շորթման գործով «գործընկերների արարքների» համար
Լրագրող և հեռուստահաղորդավար Քսենյա Սոբչակը ներողություն է խնդրել «Ռոստեկ» պետական կորպորացիայի ղեկավար Սերգեյ Չեմեզովից շորթման գործով մեղադրյալ դարձած «գործընկերների արարքների» համար։ Այս մասին ասվում է նրա թելեգրամյան ալիքի հաղորդագրության մեջ, գրում է RTVI-ը։
«Ես անկեղծորեն ափսոսում եմ, որ իմ գործընկերների գործողությունները վնասել են Սերգեյ Վիկտորովիչ Չեմեզովին, ներողություն եմ խնդրում նրանից»,- գրել է Սոբչակը։
Նա նշել է, որ շորթման գործում «քաղաքական ենթատեքստ» չկա, և որ երեք մեղադրյալներին` Կիրիլ Սուխանովին, Արյան Ռոմանովսկուն և Թամերլան Բիգաևին, առաջադրվել են «լուրջ մեղադրանքներ»։
«Ես գիտեմ, որ տղաներն անկեղծորեն զղջում են կատարվածի համար։ Նրանց ճակատագիրը կորոշի դատարանը։ Հավատում եմ, որ իրավապահ մարմինները կարեկցանք և ներողամտություն կցուցաբերեն»,- շեշտել է լրագրողը։
Նշենք, որ քննիչների տվյալներով՝ երեք մեղադրյալները Չեմեզովից 11 մլն ռուբլի են շորթել՝ բացասական տեղեկատվություն չտարածելու համար։ Նրանց սպառնում է մինչև 15 տարվա ազատազրկում։
