Այդ ժամանակ ո՞վ էր պաշտպանելու երկիրը. Զելենսկին հայտնել է, թե ինչու բնակչության գլոբալ տարհանում չի իրականացրել
Ուկրաինայի նախագահ Վլադիմիր Զելենսկին հայտարարել է, որ հրաժարվել է քաղաքների բնակչության զանգվածային տարհանում իրականացնելուց՝ ուկրաինացի զինվորականների` երկիրը պաշտպանելու մոտիվացիան պահպանելու համար: Այս մասին այսօր կայացած հեռուստամարաթոնի ժամանակ ասել է նա, հայտնում է ՏԱՍՍ-ը։
Ինչպես նշել է Զելենսկին, իրեն առաջարկվել է «խոշոր գլոբալ տարհանում»։
«Եվ այդ ժամանակ ո՞վ էր պաշտպանելու։ Կարծում եք, որ միայն ինքնաձիգով մարդի՞կ պետք է դա անեն, որ նրանք կին ու երեխա չունե՞ն։ Նրանք ունեն ծնողներ և ընտանիքներ: Իսկ ի՞նչն է նրանց մոտիվացնում մարտի դաշտում», - ասել է Ուկրաինայի ղեկավարը։
Զելենսկին նաև հավելել է, որ Ուկրաինայի բնակիչներին «կենդանի վահան» չի համարում։ Ավելի վաղ Ուկրաինայի ղեկավարը հայտարարել էր, որ հավատում է ԱՄՆ իշխանությունների հավաստիացումներին, թե Վաշինգտոնը Ուկրաինայի հարցով բանակցություններ չի վարում առանց Կիևի մասնակցության։
Նոյեմբերի 15-ին Ուկրաինայի նախագահի աշխատակազմի ղեկավարի տեղակալ Կիրիլո Տիմոշենկոն հայտնել է, որ Ուկրաինայի ուղղությամբ արձակվել է ավելի քան 90 հրթիռ, ինչի արդյունքում երկրի տարբեր շրջաններում վնասվել են 15 էներգետիկ ենթակառուցվածքային օբյեկտներ։ Հոկտեմբերի 10-ին Ռուսաստանի զինված ուժերը սկսել են հարվածներ հասցնել Ուկրաինայի ռազմական և էներգետիկ օբյեկտներին։ Սա պատասխան էր, այդ թվում՝ Ղրիմի կամրջի վրա տեղի ունեցած պայթյունին։ Ներկա պահին Ուկրաինայում շարունակվում է Ռուսաստանի Դաշնության զինված ուժերի հատուկ գործողությունը, որի մեկնարկի մասին փետրվարի 24-ին հայտարարել էր ՌԴ նախագահ Վլադիմիր Պուտինը։
