Խոշոր ավտովթար է տեղի ունեցել Եգիպտոսի հյուսիսում գտնվող Դակահլիա նահանգում․ ուղևորատար ավտոբուսը շրջվել և վայր է ընկել գետը, ինչի հետևանքով զոհվել է 20 և վիրավորվել 16 մարդ։

Այդ մասին հայտնում է Al-Masry Al-Youm թերթը։

Վթարը տեղի է ունեցել Էլ Մանսուրա և Միթ Ղամր քաղաքների միջև ճանապարհին։ Վարորդը կարողացել է դուրս նետվել մեքենայից։

Այս պահին շարունակվում են որոնողափրկարարական աշխատանքները։ Ընդհանուր առմամբ ավտոբուսում եղել է ավելի քան 45 ուղեւոր։

Նախնական տվյալներով՝ վթարի պատճառը վարորդի սխալն է՝ կտրուկ շրջադարձերից մեկում նա կորցրել է կառավարումը։ Տեղի իշխանությունները միջադեպի ավելի մանրամասն հետաքննություն են անցկացնում։