ՆԱՏՕ-ն չի ցանկանում Ուկրաինայում պատերազմի դադար Ռուսաստանի պայմաններով. Ստոլտենբերգ
ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ չի ցանկանում Ուկրաինայում ռազմական գործողությունների դադարեցում Ռուսաստանի պայմաններով։ Այս մասին նա հայտարարել է Շարմ էլ-Շեյխում կլիմայական կոնֆերանսում, փոխանցում է РИА Новости-ն։
Նրա խոսքով, նման սցենարը աղետ կլինի Ուկրաինայի համար, ինչպես նաև վտանգ` ՆԱՏՕ-ի համար, քանի որ ցույց կտա, որ ուժի կիրառումը թույլ է տալիս հասնել հարևան երկրների նկատմամբ վերահսկողություն ձեռք բերելու քաղաքական նպատակներին։
Ստոլտենբերգը հավելել է, որ Ռուսաստանը հավակնություններ է դրսևորել ոչ միայն Ուկրաինայի, այլ նաև ՆԱՏՕ-ի հետ կապված։
Ավելի վաղ Ստոլտենբերգը, պատասխանելով կազմակերպությանը անդամակցելու դեպքում Շվեդիայում և Ֆինլանդիայում միջուկային ներուժի տեղակայման հնարավորության մասին հարցին, ասել էր, որ դաշինքը չի ծրագրում փոխել իր միջուկային դիրքերը։
Ֆինլանդիայի արտաքին գործերի նախարար Պեկկա Հաավիստոն մամուլի ասուլիսի ժամանակ ասել է, որ երկիրը մտադիր չէ իր տարածքում ՆԱՏՕ-ի միջուկային զենք տեղակայել։ Նա պարզաբանել է, որ պետությունները չեն պատրաստվում ավելացնել միջուկային մարտագլխիկների թիվը Եվրոպայում։ ՆԱՏՕ-ն այս հարցերում կենտրոնանում է իր մշտական կառույցների վրա։
Հաավիստոյի դիրքորոշումը պաշտպանել է Ֆինլանդիայի պաշտպանության նախարար Անտի Կայկոնենը։ Նա նշել է, որ ոչ ոք միջուկային զենք չի պարտադրի Ֆինլանդիային ու Շվեդիային։
