Բռնցքամարտիկ Դավիթ Չալոյանը դուրս է եկել Եվրոպայի գավաթի եզրափակիչ

Հայ բռնցքամարտիկ Դավիթ Չալոյանը շարունակում է հաջող ելույթները Չեխիայում անցկացվող Եվրոպայի գավաթի գրան պրիում և նվաճել է մրցաշարի եզրափակիչի ուղեգիր։

Աշխարհի առաջնության բրոնզե մեդալակիրը կիսաեզրափակիչ մենամարտում ուժերն է չափել անգլիացի Աչուշի Քլինթոնի հետ, ով մինչ այդ առավելության էր հասել Փարիզի օլիմպիական խաղերի մրցանակակիր Աբոուդո Ջամիլի նկատմամբ։ Մրցապայքարի մեկնարկային ռաունդում Չալոյանը մրցակցին զիջել է 2:3 հաշվով, սակայն երկրորդ ռաունդում կարողացել է փոխել հանդիպման ընթացքը՝ հաղթելով 4:1 հաշվով։ 

Հայ բռնցքամարտիկը առավելություն է գրանցել նաև երրորդ ռաունդում՝ հաղթելով 5:0 հաշվով և նվաճելով եզրափակիչի տեղը։ Տիտղոսի համար վճռորոշ մենամարտում Չալոյանի մրցակիցը կլինի Հնդկաստանը ներկայացնող Նարենդեր Նարենդերը։ Եզրափակիչ հանդիպումը նախատեսված է հունիսի 20-ին։