Իսրայելը և Լիբանանը ծովային սահմանի սահմանագծման մասին համաձայնագիր են ստորագրել
Իսրայելը և Լիբանանը, որոնք պաշտոնապես պատերազմական վիճակում են, լուծել են երկարամյա վեճը: Այս մասին գրում է Euronews-ը:
Կողմերի ներկայացուցիչները համաձայնագիր են ստորագրել ծովային սահմանի սահմանազատման մասին։ Արարողություններն անցկացվել են առանձին։ Հրեական պետությունում փաստաթուղթը ստորագրել է վարչապետ Յաիր Լապիդը՝ բանակցային թիմի ներկայությամբ։
Իսրայելի պաշտպանության նախարար Բենի Գանցը, ով այդ ժամանակ գտնվում էր Թուրքիայում, ողջունել է գործարքը:
«Ծովային սահմանի մասին համաձայնագիրը արտացոլում է հակառակորդ կողմերի՝ հանուն կայունության և տնտեսական բարգավաճման համագործակցելու կարողությունը: Այս համաձայնագիրը արժեքավոր ներդրում է Իսրայելի անվտանգության, ինչպես նաև տարածաշրջանի կայունության և անվտանգության համար»,- ասել է նա:
Լիբանանի նախագահ Միշել Աունը Բեյրութում ստորագրել է ՄԱԿ-ի Անվտանգության խորհրդին ուղղված պաշտոնական ուղերձը Իսրայելի հետ համաձայնագրի հաստատման վերաբերյալ։ Բանակցությունները շարունակվել են երկու տարի՝ որպես միջնորդ հանդես է եկել Ամերիկայի Միացյալ Նահանգները:
