Հայաստան կուղարկվի տեխնիկական թիմ՝ Ադրբեջանի հետ սահմանամերձ տարածքներում իրավիճակը գնահատելու համար. ԵԱՀԿ

ՀՀ կառավարության հրավերով ԵԱՀԿ-ն հոկտեմբերի 21-27-ը երկիր կուղարկի կարիքների գնահատման թիմ։ Այս մասին ասվում է osce.org կայքում:

Նշվում է, որ թիմի այցի նպատակը իրավիճակը որոշ սահմանամերձ շրջաններում գնահատելն է՝ հիմք ընդունելով ԵԱՀԿ մանդատը և փորձը՝ անվտանգության համապարփակ հայեցակարգի շրջանակում։

Միջազգային փորձագետներից և ԵԱՀԿ քարտուղարության ներկայացուցիչներից կազմված տեխնիկական խումբը կայցելի հայ-ադրբեջանական սահմանի երկայնքով տեղակայված տարածքներ և խորհրդակցություններ կանցկացնի համապատասխան ազգային և տեղական շահագրգիռ կողմերի, ինչպես նաև տեղում միջազգային գործընկերների հետ: