Խնդրում եմ Կենտրոնական Ասիայի երկրներին չվերաբերվել որպես նախկին ԽՍՀՄ-ի. Տաջիկստանի նախագահը՝ Պուտինին

Տաջիկստանի նախագահ Էմոմալի Ռահմոնը դիմել է ՌԴ նախագահ Վլադիմիր Պուտինին՝ խնդրելով Կենտրոնական Ասիայի երկրներին չվերաբերվել որպես նախկին ԽՍՀՄ երկրների: 

Ինչպես գրում է «Կոմերսանտ»-ը՝ Էմոմալի Ռահմոնն այս մասին հայտարարել է  Աստանայում Ռուսաստան-Կենտրոնական Ասիա ֆորումի ժամանակ, որին մասնակցում է նաև Պուտինը: 

«Այն ժամանակ, ինչպես հիմա, ուշադրություն չկար փոքր հանրապետությունների, փոքր ժողովուրդների նկատմամբ։ Ավանդույթներն ու սովորույթները հաշվի չեն առնվել։ Նրանք չեն աջակցել զարգացմանը»,- ասել է Ռահմոնը։

«Մենք ուզում ենք, որ մեզ հարգեն։ Որտե՞ղ ենք ինչ-որ բան կոտրել: Ինչ-որ տեղ սխա՞լ ենք բարևել: Մենք միշտ հարգել ենք մեր գլխավոր ռազմավարական գործընկերոջ (Ռուսաստանի) շահերը։ Մենք ուզում ենք, որ մեզ հարգեն։ Ինչ է, մենք ինչ-որ օտարերկրացի՞ ենք: Մենք մեծ ներդրումների կարիք չունենք: Վլադիմիր Վլադիմիրովիչ, խնդրում եմ Կենտրոնական Ասիայի երկրների հարցում չունենալ այնպիսի քաղաքականություն ինչպիսին նախկին Խորհրդային Միության նկատմամբ էր»,- ասել է Տաջիկստանի նախագահը։