ԱՄՆ հետախուզությունը տվյալներ չունի Ռուսաստանի կողմից միջուկային զենք կիրառելու մտադրության մասին. Սպիտակ տուն
ԱՄՆ հետախուզական ծառայությունները տվյալներ չունեն Ռուսաստանի կողմից միջուկային հարված պատրաստելու մասին։ Այս մասին այսօր հայտարարել է Սպիտակ տան մամուլի քարտուղար Կարին Ժան Պիերը հերթական ճեպազրույցի ժամանակ, գրու մէ Kp.ru-ն:
«Ոչ, ոչ», - ասել է Ժան-Պիերը՝ ի պատասխան այն հարցին, թե արդյոք ԱՄՆ հետախուզությունը տեղեկություն ունի միջուկային զենք օգտագործելու Ռուսաստանի մտադրության մասին:
Խոսնակը հավելել է, որ ԱՄՆ նախագահ Ջո Բայդենը հինգշաբթի օրվա իր ելույթում օգտագործել է «արմագեդոն» բառը՝ մտահոգություն հայտնելու Ռուսաստանի նախագահ Վլադիմիր Պուտինի՝ միջուկային զենք օգտագործելու ենթադրյալ սպառնալիքների վերաբերյալ։
Կարին Ժան-Պիեռը միաժամանակ ասել է, որ ԱՄՆ-ն «պատճառ չի տեսնում սեփական միջուկային ուժերի տեղակայումը շտկելու համար»։
Ավելի վաղ ԱՄՆ նախագահ Ջո Բայդենը հայտարարել էր, որ Սառը պատերազմից և Կարիբյան ավազանի ճգնաժամից հետո առաջին անգամ աշխարհը կարող է բախվել միջուկային պատերազմի։ Բայդենն այս մտահոգություններն արտահայտելու համար օգտագործել էր «Արմագեդոն» տերմինը և իրավիճակի սրման մեղավորությունը բարդել Ռուսաստանի ղեկավարության վրա։
