Բելառուսի նախագահ Ալեքսանդր Լուկաշենկոն իր ռուս գործընկեր Վլադիմիր Պուտինի հետ բանակցություններում ասել է, որ 2020 թվականի նախագահական ընտրություններից հետո հանրապետությունը լքած բելառուսական ընդդիմության ներկայացուցիչների մեծ մասը խնդրում է վերադառնալ երկիր։ Այս մասին հայտնում է ՌԻԱ Նովոստին:

«Ես իսկապես չէի անհանգստանում, երբ 2020 թվականին մի քանի հազար (բելառուսներ – խմբ.) հեռացան, նրանք խնդրում են վերադառնալ (հիմա – խմբ.): Մեծամասնությունն ասում է՝ հետ ընդունեք»,- ասել է Լուկաշենկոն։

Բելառուսի նախագահը կարծիք է հայտնել, որ միգրացիայի հետ կապված իրավիճակը նույն կերպ կզարգանա հիմա՝ Ռուսաստանում մասնակի մոբիլիզացիայի հայտարարությունից հետո։

«Տեսնում եմ՝ մեզ մոբիլիզացիայով են վախեցնում, այստեղ ինչ-որ մեկը փախել է արտերկիր, Ռուսաստանն ունի 25 միլիոն մարդ՝ մոբիլիզացիոն ռեսուրս, դե թող 30, լավ, 50 հազարը փախչեն, եթե մնային այստեղ, ի՞նչ, թող փախչեն... Եվ սրանք կգան, միայն պետք է որոշել, թե ինչ անել նրանց հետ»,- նշել է Լուկաշենկոն։