«Պատահական մարդիկ չէին». ինչ է քննարկել Սաղաթելյանը ԵԽ-ում

Աժ «Հայաստան» խմբակցության պատգամավոր Իշխան Սաղաթելյանն այսօր լրագրողների հետ հանդիպմանը հայտնեց, որ Եվրոպական խորհրդարանում բոլոր հանդիպումների ժամանակ գլխավոր օրակարգը եղել է Արցախը, արցախյան  բանակցությունների գործընթացը, ՀՀ անվտանգությունը:

Սաղաթելյանը բոլոր հանդիպումների ժամանակ բարձրացրել է Ադրբեջանում պահվող հայ ռազմագերիների հարցը:

«Միջազգային կառույցներում, մասնավորապես, ԵԽ-ում, Հայաստանի ու Արցախի  շահերը պատշաճ կերպով ներկայացված չեն, ու այդ հանդիպումների ընթացքում  ակնհայտ դարձավ, որ Հայաստանի խորհրդարանական դիվանագիտությունն ու ՀՀ ԱԳՆ-ն պատշաճ կերպով չեն ներկայացնում ու պաշտպանում Հայաստանի, Արցախի ու հայ  ժողովրդի շահը», - ասաց Սաղաթելյանը:
 

Վերջինս ընդծեց, որ Արցախի կարգավիճակի հարցում նշաձող իջեցնելու միջազգային պահանջ գոյություն չունի, թեև ՀՀ իշխանությունները հակառակն են պնդում։

«Այն բոլոր հանդիպումները, որ ես ունեցել եմ, պատահական մարդիկ չէին, Հայաստանի հարցով կարծիք ձևավորող, դիրքորոշում ու  տեսակետ հայտնող պաշտոնյաներ էին, հստակ ու ընդգծված նշաձող իջեցնելու պահանջ գոյություն չունի», - ասաց նա:
 

Պատգամավորը նշեց, թե կա խաղաղության հասնելու պահանջ. ինքը` Սաղաթելյանը, ասել  է` դեմ չեն խաղաղության օրակարգին, բայց խաղաղությունը չի կարող լիներ  հայրենազրկման գնով:

«Ասել ենք` պարտադրված խաղաղությունը չի կարող տարածաշրջանում բերել կայունություն. այս հիմնավորումներն իրենց համար շատ հասկանալի էին», - ասաց ընդդիմադիր պատգամավորը: