BMW ավտոկոնցեռնը կդադարեցնի իր գործարանների աշխատանքը, եթե ՌԴ–ից գազի մատակարարումը դադարեցվի
Եթե ՌԴ–ից գազի մատակարարումը դադարեցվի, BMW ավտոկոնցեռնը կդադարեցնի իր գործարանների աշխատանքը։ Ինչպես հաղորդում է «ՌԲԿ»–ն` այս մասին հայտարարել է BMW–ի տնօրենների խորհրդի անդամ Միլան Նեդելկովիչը։
Նրա խոսքով` Գերմանիայի արդյունաբերությանը բաժին է ընկնում երկրում բնական գազի սպառման շուրջ 37 %–ը։ Ավելին, Նեդելկովիչը մտավախություն ունի, որ մատակարարումների դադարեցման պատճառով կարող է կանգ առնել ոչ միայն BMW–ն, այլև ամբողջ արդյունաբերական սեկտորը։
Ընկերության գլխավոր մենեջերը նաև հավելել է, որ 2021 թվականին բնական գազը կազմել է BMW–ի ընդհանուր էներգիայի սպառման 54 %–ը։
Նեդելկեվիչը միաժամանակ նշել է, որ ընկերությունն արդեն ընտրել է այլընտրանքային աղբյուրների զարգացման ուղղությունը և ներդրումներ է կատարում արևային, երկրաջերմային և ջրածնային էներգետիկայում, ինչը թույլ կտա ապագայում նվազեցնել կախվածությունը բնական գազից:
Հունգարական Դեբրեցենի նոր գործարանը կդառնա աշխարհում առաջին ավտոմոբիլային ձեռնարկությունը, որն ամբողջությամբ աշխատում է առանց հանածո վառելիքի: Այնտեղ շեշտը դրվելու է արևային էներգիայի վրա։
