Ռուսական «ԿԱՄԱԶ» գործարանը կգործի Ադրբեջանի կողմից օկուպացված տարածքում
Նախատեսվում է, որ 2022 թվականի երկրորդ եռամսյակում Արցախի՝ 44-օրյա պատերազմի հետևանքով Բաքվի վերահսկողության տակ անցած հատվածում շահագործման կհանձնվի ռուսական «ԿԱՄԱԶ» ՓԲԸ-ի գործարանը։
Trend-ը հայտնում է, որ այս մասին Բաքվում Ռուսաստանի և Ադրբեջանի միջև տնտեսական համագործակցության միջկառավարական հանձնաժողովի լիագումար նիստի ժամանակ ասել է ՌԴ փոխվարչապետ Ալեքսեյ Օվերչուկը։
Նրա խոսքով, կողմերը կշարունակեն աշխատել առևտրատնտեսական համագործակցության զարգացման ուղղությամբ։
Ադրբեջանի փոխվարչապետ Շահին Մուստաֆաևը նշել է, որ ռուսական ընկերությունները ներկայացրել են 17 նախագիծ, որոնք մտադիր են իրականացնել Արցախի ներկայում օկուպացված տարածքներում:
Հիշեցնենք, որ 2020-ի նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը` բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։
