Նոր մանրամասներ՝ երեկ «Ապավեն» ՍՊԸ-ում նռնակով ինքնասպանության փորձի դեպքից
Երեկ, մարտի 2-ին, Հայաստանի քննչական կոմիտեի Երևան քաղաքի քննչական վարչության Շենգավիթի քննչական բաժնի հատկապես կարևոր գործերով ավագ քննիչ Արա Ավագյանի որոշմամբ ձերբակալվել է Երևան քաղաքի բնակիչ՝ 32-ամյա Էդգար Կ-ն։
Ինչպես հայտնում է shamshyan.com-ը, վերջինս ձերբակալվել է նույն օրը Արարատյան փողոցի 43 հասցեում գործող «Ապավեն» տերմինալում տեղի ունեցած միջադեպի փաստով։
Հարուցված քրեական գործի շրջանակում պարզվել է, որ նույն օրը, ժամը 18։50-ին նշված տերմինալի անվտանգության պետ՝ 40-ամյա Պ. Շ-ն ահազանգել է ոստիկանություն և հայտնել, որ տերմինալի տարածքում իրենց աշխատակիցներից Էդգար Կ-ն ոչ սթափ վիճակում հարվածել է տեղում ծառայություն իրականացնող անվտանգության աշխատակիցներից մեկին և մարտական նռնակը ձեռքին՝ սպառնում է ինքնասպան լինել։
Նույն օրը, ժամը 20։00-ի սահմաններում «Շենգավիթ» բժշկական կենտրոնից ոստիկանության Շենգավիթի բաժին ահազանգ է ստացվել, որ շտապօգնության 65 խումբը «աջ սրունքի ոսկրերի փակ կոտրվածք, դեմքի սալջարդ» ախտորոշմամբ իրենց մոտ է տեղափոխել մի քաղաքացու։
Հիվանդանոց մեկնած ոստիկանության Շենգավիթի բաժնի ծառայողները՝ բաժնի պետ Կարեն Բունիաթյանի գլխավորությամբ պարզել են, որ տեղափոխվածը Երևանի բնակիչ՝ 73-ամյա Ավետիս Ա-ն է, ով «Ապավեն» ՍՊԸ-ի անվտանգության աշխատակից է։
Վերջինս ոստիկաններին հայտնել է, որ վնասվածքը ստացել է աշխատանքի վայրում բռնի գործողությունների ժամանակ։ Նյութերի նախապատրաստման ընթացքում պարզվել է նաև, որ Էդգար Կ-ն «F-1» տիպի նռնակը ձեռքին վիճաբանել է Ավետիս Ա-ի հետ, որի ժամանակ հարվածներ է հասցրել նրան, ապա կոտրել գրասենյակի մուտքի դուռը և բակում կայանված «Ապավեն» ՍՊԸ-ի տնօրեն, 57-ամյա Էդուարդ Ս-ին պատկանող Mercedes մակնիշի ավտոմեքենայի հետևի ապակին։
Այնուհետև հայտնել է, որ ինքն իրեն պայթեցնելու է։ Տեղում ոստիկանների բացատրական աշխատանքի շնորհիվ Էդգար Կ-ն ձեռքի նռնակը նետել է անվտանգ վայր, որը պայթել է, որից հետո նրան բերման ենթարկել ոստիկանությն Շենգավիթի բաժին, այնտեղից էլ նրան ներկայացրել են քննչական բաժին։ Հարուցված քրեական գործի նախաքննությունը շարունակվում է։
