Ուկրաինայի շուրջ ԶԼՄ-ների հաղորդագրությունների մի մասն ապատեղեկատվություն է. Թուրքիայի ՊՆ
Ուկրաինայում ռազմական ակտիվության մասին ԶԼՄ-ների հաղորդագրությունները պետք է զգուշորեն գնահատել, քանի որ դրանց մի մասն ապատեղեկատվություն է: Կիրակի այդ կարծիքն է հայտնել Թուրքիայի ազգային պաշտպանության նախարար Հուլուսի Աքարը, հաղորդում է ՏԱՍՍ-ը:
«Այդտեղ դիտվում է ռազմական ակտիվություն, որն ունի որոշակի հետեւանքներ: ԶԼՄ-ներում կան որոշ հաղորդագրություններ այդ մասին, դրանք պետք է շատ զգուշորեն գնահատել, քանի որ խոսքը վերաբերում է ապատեղեկատվությանն ու ֆեյք-նյուզին: Այդ կապակցությամբ անհրաժեշտ է կանխարգելել մի շարք անցանկալի իրավիճակների առաջացումը»,-նրա խոսքերը մեջբերում է Sabah թերթը:
Բացի այդ, Աքարն ընդգծել է, որ Մյունխենի անվտանգության համաժողովի ժամանակ Թուրքիան մեկնաբանել է իրավիճակը նեղուցների կարգավիճակի մասին Մոնտրյոյի կոնվենցիայի շուրջ: «Մենք հայտարարել ենք, որ կոնվենցիայի դրույթները շահավետ են բոլոր կողմերի համար: Մենք անկեղծորեն ցանկանում ենք, որ Սեւ ծովի ափերին տեղակայված երկրներն ապրեն անվտանգության եւ հարմարավետության պայմաններում»,-հավելել է Թուրքիայի Պաշտպանության նախարարը:
