Կիևը պատրաստ է մասնակցել Դոնբասում դեէսկալացիայի կոնտակտային խմբի քննարկմանը

Ուկրաինան պատրաստ է եռակողմ կոնտակտային խմբի շրջանակներում քննարկել իրավիճակը Դոնբասում սադրանքները կանխելու համար։ 

Ուկրաինական պատվիրակությունն իր թելեգրամյան ալիքում հայտարարել է, որ խմբում ԵԱՀԿ համակարգողի նախաձեռնությամբ փետրվարի 18-ին նախատեսված արտահերթ նիստը չի կայացել «ռուսական կողմի մերժման պատճառով»։

Իր հերթին Ուկրաինայի փոխվարչապետ Իրինա Վերեշչուկը հայտարարել է, թե Կիևը հույս ունի, որ կոնտակտային խմբի հանդիպումը կկայանա փետրվարի 19-ին, և պատրաստ է անել ամեն ինչ հրադադարը վերականգնելու համար։
 

«Մենք հուսով ենք, որ նման հանդիպում տեղի կունենա վաղը: Մենք պատրաստ ենք աշխատել, պատրաստ ենք երկխոսության, պատրաստ ենք ամեն ինչ անել, որպեսզի հրադադարի ռեժիմը վերականգնվի և խաղաղ բնակչությունը չտուժի»,- ասել է Վերեշչուկը այսօրվա ճեպազրույցում:

Հիշեցնենք, որ Ուկրաինայի Ազգային անվտանգության և պաշտպանության խորհրդի քարտուղար Ալեքսի Դանիլովն էլ հայտարարել է, որ Ուկրաինան չի ծրագրում բանակցել ինքնահռչակ հանրապետությունների ղեկավարության հետ: Միևնույն ժամանակ նա նշել է, որ Կիևից Դոնբասի ազատագրման հրաման չեն ստացել։

Ավելի վաղ Ուկրաինայի զինված ուժերի գլխավոր հրամանատար Վալերի Զալուժնին հայտարարել էր, որ Դոնբասում հարձակողական գործողություններ չեն նախատեսվում։ Այսօր ավելի վաղ Ուկրաինայի արտգործնախարար Դմիտրի Կուլեբան էլ հայտնել էր, որ «Ուկրաինան Դոնբասում հարձակողական գործողություններ և դիվերսիաներ չի իրականացնում և չի ծրագրում»։