ԱՄՆ զորքերը չեն օգնի Ուկրաինայից ամերիկացիների տարհանման հարցում. Բայդեն

11.02.2022 04:45

ԱՄՆ նախագահ Ջո Բայդենը հայտարարել է, որ բոլոր ամերիկացիները պետք է անհապաղ լքեն Ուկրաինան՝ Ռուսաստանի կողմից ներխուժման մտավախությունների պատճառով։ Նա նաև ընդգծել է, որ չի ուղարկի զինվորականներին՝ օգնելու տարհանմանը։

Հիշեցնենք, որ Պենտագոնը նախօրեին հայտարարել էր, որ ռազմական անձնակազմը կարող է ներգրավվել Ուկրաինայի տարածքից ԱՄՆ քաղաքացիների դուրսբերման գործին:

Ջո Բայդենը NBC-ին տված հարցազրույցում ասել է, որ «ԱՄՆ քաղաքացիները պետք է անհապաղ հեռանան» Ուկրաինայից։

«Խոսքը ահաբեկչական կազմակերպության մասին չէ։ Մենք գործ ունենք աշխարհի ամենամեծ բանակներից մեկի հետ (նկատի ունի ռուսական բանակը.-Կոմերսանտ)։ Սա բոլորովին այլ իրավիճակ է, և ամեն ինչ կարող է արագ սխալվել»,- համոզված է ԱՄՆ նախագահը։

Ճշտող հարցին, թե հնարավո՞ր է սցենար, որի դեպքում ԱՄՆ-ի զորքերը կօգտագործվեն ամերիկացիներին տարհանելու համար, Ջո Բայդենը բացասական պատասխան է տվել. «Եթե ամերիկացիներն ու ռուսները սկսեն կրակել միմյանց վրա, համաշխարհային պատերազմ կլինի»։

Միացյալ Նահանգների նախագահն ասել է, որ «եթե Վլադիմիր Պուտինը բավական հիմար է ներխուժում սկսելու համար, ապա նա այնքան խելացի կլինի՝ չանելու որևէ բան, որը կարող է բացասաբար անդրադառնալ Ամերիկայի քաղաքացիների վրա»։

Այն հարցին, թե արդյոք պարոն Բայդենը դա ասել է ՌԴ նախագահին, նա դրական պատասխանեց. «Ես ստիպված չէի նրան դա ասել, ես արդեն խոսել եմ այս թեմայով: Նա ամեն ինչ գիտի»,- հավելել է Ջո Բայդենը։

Թե կոնկրետ երբ է այդ հարցը քննարկվել պարոն Պուտինի հետ, նա չի մանրամասնել