«Խաղաղասեր եմ և նման հրամաններ չեմ արձակում»․ Լուկաշենկո

Բելառուսի նախագահ Ալեքսանդր Լուկաշենկոն ժողովրդին ու խորհրդարանին հղած իր ուղերձում ասել է, որ Բելառուսի քաղաքացիներին ոչ մի դեպքում չի ուղարկի պատերազմելու մեկ այլ ժողովրդի դեմ՝ օտար երկրի տարածքում։

«Երբեք և ոչ մի տեղ չեմ ասել ու չեմ ասի, որ Բելառուսի քաղաքացիներին կուղարկեմ այլ երկրի տարածք՝ պատերազմելու որևիցե ժողովրդի դեմ։ Ուկրաինան եք հիշատակում։ Աստված մի արասցե, որ պատերազմեմ այդ ժողովրդի դեմ, որտեղ, գուցե, նաև իմ արմատներն են թաքնված։ Այդպիսի բան չկա, ես խաղաղասեր եմ և նման հրամաններ չեմ արձակում»,- ասել է Լուկաշենկոն։

Նա հայտարարել է նաև, որ Բելառուսը ռազմական առճակատման մեջ կարող է մտնել միայն իր կամ Ռուսաստանի Դաշնության նկատմամբ ուղիղ ագրեսիայի դեպքում։

«Կարծում եմ՝ դա բացառություն կլինի և մեծ հույս ունեմ, այսօր գրեթե համոզված եմ, որ մենք չենք պատերազմի նույնիսկ նշված երկու դեպքում»,- ասել է Լուկաշենկոն՝ միևնույն ժամանակ նշելով, որ ՀԱՊԿ խաղաղարար զորքերի կազմում բելառուս խաղաղապահներին Ղազախստան ուղարկելու որոշումն ինքը դժվարությամբ է ընդունել։  

«Այդ պատճառով մի կարծեք, որ գլխումս կարող է միտք ծագել, որ իմ ու ձեր զավակներին պետք է ուղարկեմ պատերազմելու։ Ոչ։ Մեր բանակը նրա համար է ստեղծվել, որպեսզի մեր տարածքում պաշտպանի մեզ։ Մենք երբեք պատերազմի աղբյուր չենք լինի, հիշեք սա»,- ասել է Լուկաշենկոն։