«Թալիբան» շարժման պատվիրակությունը մեկնել է Օսլո՝ բանակցությունների

ԱՖղանստանում իշխանությունը գրաված ծայրահեղական «Թալիբան» շարժման պատվիրակությունը, Նորվեգիայի ԱԳ նախարարության հրավերով, մեկնել է Օսլո՝ բանակցություններ վարելու մի շարք երկրների և աֆղանական հասարակական-քաղաքական ուժերի ներկայացուցիչների հետ։ Թվիթերում այս մասին գրառում է արել թալիբների ներկայացուցիչը։

«Աֆղանստանի Իսլամական էմիության բարձրաստիճան ղեկավարությունը, ԱԳ նախարար Ամիր Խան Մոթաքիի գլխավորությամբ, հատուկ չվերթով մեկնել է Նորվեգիա, որտեղ բանակցություններ կկայանան տարբեր երկրների ներկայացուցիչների և մի շարք աֆղանստանցիների հետ՝ հումանիտար օգնության տրամադրման, ինչպես նաև քաղաքական, կրթական ու տնտեսական հարցերի շուրջ»,- գրել է «Թալիբան» շարժման ներկայացուցիչը։

Ավելի վաղ Նորվեգիայի ԱԳ նախարարությունը հայտարարել էր, որ «Թալիբան» շարժման պատվիրակությանը հրավիրել է Օսլո՝ հունվարի 23-ից 25-ը մասնակցելու նորվեգական իշխանությունների, միջազգային հանրության և Աֆղանստանի քաղաքացիական հասարակության ներկայացուցիչների հետ բանակցություններին։

Նորվեգիայի արտաքին քաղաքական գերատեսչությունում ընդգծել էին, որ նախատեսվող հանդիպումները չեն նշանանակում, որ Աֆղանստանում թալիբների ձևավորած ժամանակավոր կառավարությունը ճանաչվում է։