Ֆրանսիան Լեհաստանին հավաստիացրել է` Բելառուսի հետ բախման դեպքում ԵՄ-ից աջակցություն կստանա

Ֆրանսիան Լեհաստանին հավաստիացրել է, որ Բելառուսի հետ առճակատման հարցում ԵՄ-ի աջակցությունը կստանա, սակայն Վարշավային հիշեցրել է, որ նրան անհրաժեշտ է լուծել ԵՄ-ի հետ տարաձայնությունները, հայտնում է Reuters-ը։

Լեհաստանի վարչապետ Մատեուշ Մորավեցկին հանդիպել է Ֆրանսիայի նախագահ Էմանուել Մակրոնի հետ՝ դիվանագիտական ​​այն ջանքերի շրջանակում, որը մոբիլիզացվում է որպես կոշտ պատասխան  այն բանին, ինչը Եվրահանձնաժողովի նախագահ Ուրսուլա ֆոն դեր Լյայենը անվանել է Եվրամիությունը «ապակայունացնելու» համար միգրանտներին օգտագործելու Բելառուսի փորձ:

Թեեւ Մակրոնը հաստատել է իր համերաշխությունը Լեհաստանի հետ, նա կրկին իր մտահոգությունն է հայտնել օրենքի գերակայության վերաբերյալ եւ «Լեհաստանի կառավարությանը կոչ է արել գտնել լուծում, որը կպաշտպանի Եվրամիության հիմնական արժեքները»:

Բրյուսելը երկարատեւ վեճի մեջ է Վարշավայի հետ՝ Լեհաստանի դատական ​​համակարգի անկախության, մամուլի ազատության եւ ԼԳԲՏ իրավունքների հարցերում: Վեճը գագաթնակետին է հասել հոկտեմբերին, երբ լեհական դատարանի որոշումը կասկածի տակ է դրել ԵՄ իրավունքի գերակայությունը, որը Բրյուսելը դիտել է որպես մարտահրավեր ԵՄ միասնությանը:

Մորավեցկին ասել է, որ ինքը Բելառուսի դեմ պատժամիջոցների հնարավոր ավելացումը քննարկել է Մակրոնի հետ, ում գրասենյակից հայտնել են, որ նա հաստատել է Բելառուսի նախագահ Ալեքսանդր Լուկաշենկոյի վրա ճնշում գործադրելու իր ցանկությունը։