Պեսկովը մեկնաբանել է Ուկրաինա «ներխուժելու» Ռուսաստանի ծրագրերի մասին լուրը

Ենթադրություններն այն մասին, որ Ռուսաստանը Ուկրաինա ներխուժելու ծրագրեր ունի, Կրեմլում անվանել են դատարկաբանություն և իրավիճակի անհիմն սրում։

«Սա առաջին հրապարակումը չէ, ԱՄՆ-ի առաջին հայտարարությունը չէ այն մասին, որ իրենք մտահոգված են ՌԴ տարածքում մեր զինված ուժերի տեղաշարժով։ Բազմիցս մենք դրա վերաբերյալ ասել ենք, որ մեր տարածքում մեր զինված ուժերի տեղաշարժը որևէ մեկի մոտ չպետք է մտահոգություն առաջացնի, ՌԴ–ն ոչ մեկի համար վտանգ չի ներկայացնում», – «Ուկրաինայի տարածք ներխուժելու վերաբերյալ ՌԴ ծրագրերի» մասին արևմտյան ԶԼՄ–ներում հայտնված տեղեկությունները մեկնաբանելիս լրագրողներին ասել է ՌԴ նախագահի մամուլի քարտուղար Դմիտրի Պեսկովը։

«Արդյոք Կրեմլում կարծում են, որ իրավիճակն էլ ավելի է սրվում» ճշգրտող հարցին ի պատասխան Պեսկովը օրինակ է բերել Սև ծովում ստեղծված իրավիճակը, որտեղ ՆԱՏՕ–ի ինքնաթիռները, հետախույզ–ինքնաթիռները, այդ թվում ամերիկյան, երկնքից ակտիվ հետախուզական գործունեություն են ծավալում։

«Այդ ամենը, իհարկե, չի կարող մեզ անտարբեր թողնել տեղի ունեցողի նկատմամբ։ Մենք պետք է պատրաստ լինենք։ Չէ՞ որ դրանք մեր բարեկամները չեն, չէ՞ որ մեր դաշնակից Բելառուսի ինքնաթիռները չեն թռչում։ Դրանք նրանց ինքնաթիռներն են, ովքեր իրենց հիմնական նպատակն են հռչակել ՌԴ–ի զսպումն ու նրան հակազդումը, նրանց, ովքեր ՌԴ–ին թշնամի են անվանում»,– ասել է Պեսկովը։

Նա պարզաբանել է, որ Ռուսաստանը պետք է ապահովագրի իրեն և ինչ–որ ձևով նվազեցնի ռիսկերը։ Պեսկովը հավելել է նաև, որ Ռուսաստանը կատարելու է դեպի Եվրոպա գազի մատակարարման իր պարտավորությունները, դա կասկածի ենթակա չէ։ «Ռուսաստանի հուսալիությունը որպես մատակարար և որպես գործընկեր գործող ու ապագա պայմանագրերի շրջանակում կասկածի ենթակա չէ»,– նշել է նա։

Ավելի վաղ Բելառուսի նախագահ Ալեքսանդր Լուկաշենկոն խորհուրդ էր տվել ԵՄ–ին, Մինսկի նկատմամբ պատժամիջոցներ կիրառելուց առաջ, մտածել հանրապետության տարածքով անցնող գազի և բեռների տարանցման մասին։ Լուկաշենկոն հիշեցրել էր, որ երկրով անցնում է «Յամալ–Եվրոպա» արտահանող մագիստրալային գազատարը, ընդ որում վերջին շրջանում Ռուսաստանից դեպի Արևմուտք գազի տարանցման ծավալները զգալիորեն մեծացել են։