«Դելտա» շտամով վարակվում են նաև երեխաները. Դպրոցների փակումը որոշ արդյունք տվել է. նախարար
Դպրոցների ու բուհերի դասապրոցեսի ժամանակավոր դադարը տվել է որոշակի արդյունք կորոնավիրուսի համավարակի դեմ պայքարում: Այս մասին այսօր ԱԺ առողջապահության, ֆինանսավարկային և բյուջետային հարցերի մշտական հանձնաժողովների համատեղ նիստում ասաց ՀՀ առողջապահության նախարար Անահիտ Ավանեսյանը:
«Նախորդ շաբաթվա ընթացում դպրոցների արձակուրդն ու բուհերի առցանց դասվանդումը որոշակի դրական միտում ունեցել է՝ գոնե թվերի պահպանման առումով»,- ասաց նա:
Առողջապահության նախարարը հայտնեց, որ կորոնավիրուսի «դելտա» շտամով վարակվում են նաև երեխաները, և այն երբեմն բավական ծանր ընթացք է ունենում նաև երեխաների մոտ:
Դիմակների կրման ռեժիմը, Ավանեսյանի դիտարկմամբ, թեև խստացվել է, բայց առայժմ ցանկալի մակարդակի վրա չէ:
Իսկ հիվանդության դեմ պայքարի միակ ու արդյունավետ միջոցը, ըստ նախարարի, պատվաստումն է:
