Որոնումները դեռ չեն իրականացվում, Ադրբեջանը թույլ չի տալիս. Հունան Թադևոսյան. Panorama
Հոկտեմբերի 18-ից Ադրբեջանի վերահսկողության տակ անցած տարածքներում ռազմական գործողությունների ընթացքում զոհված և մինչ օրս անհետ կորած համարվող զինծառայողների աճյունների որոնողական աշխատանքներ չեն իրականացվում։ Պատճառը՝ ադրբեջանական կողմն է։
«Մեր թիմը միշտ պատրաստ է, միշտ գնում ենք բանակցությունների, սակայն հոկտեմբերի 18-ից հետո մերժվում ենք։ Ադրբեջանական կողմն առանց որևէ մեկնաբանության, պատճառաբանության թույլ չի տալիս որոնողական աշխատանքներ իրականացնել։ Մեզ մոտ այս պահին սպասողական վիճակ է»,-Panorama.am-ի հետ զրույցում ասաց Արցախի Հանրապետության ՆԳՆ արտակարգ իրավիճակների պետական ծառայության մամուլի խոսնակ Հունան Թադևոսյանը։
2020 թվականի նոյեմբերի 13-ից մինչև այս տարվա հոկտեմբերի 20-ը ներառյալ, որոնողական աշխատանքների և դիերի փոխանակման արդյունքում հաստատվել է ընդհանուր 1686 աճյուն, որոնց թվում նաև քաղաքացիական անձինք են։
